საქართველოს რაგბის ეროვნული ნაკრები ევროპის ჩემპიონია!

საქართველო 38-11 პორტუგალია

მე-15 ტიტული და მე-100 გამარჯვება!

საქართველო-პორტუგალია 38:11

საქართველო (15-9): ნინიაშვილი, ტაბუცაძე, თაფლაძე, შარიქაძე, თოდუა (კახოიძე 78), აბჟანდაძე (მატკავა 67), ლობჟანიძე (აფრასიძე 62); (1-8): აბულაძე (გოგიჩაშვილი 53), მამუკაშვილი (ჭყოიძე 53), გიგაშვილი (პაპიძე 61), ჭეიშვილი (ჩაჩანიძე 61), მიქაუტაძე, ცუცქირიძე (ჯალაღონია 67), საღინაძე, გორგაძე;

6ლ: ტაბუცაძე (2), მამუკაშვილი, ჭყოიძე, პაპიძე, თაფლაძე. 4გ: აბჟანდაძე (2), მატკავა (2)

სინბინი: შარიქაძე, ლობჟანიძე

პორტუგალია (15-9): ბენტუ, პინტუ (კარდოზო 77), ლიმა, ეპლტონი, მარტა, პურტელა, ლუკში (ბელუ 64); (1-8): ფერნანდესი, ტაჯერი (დინიში 59), ფერეირა, სერკეირა (გრანატე 64), ანდრადე, მადეირა, მარტინსი, დე ფრეიტაში.

ლ: ეპლთონი. 2ს: ბენტუ

სინბინი: ეპლთონი, მარტინსი

მსაჯი: ლუდოვიკ კეირი (საფრანგეთი)

ფინალის ამსახველი ვიდეო:

საქართველოს ნაკრებმა რაგბი ევროპის ჩემპიონატი კიდევ ერთხელ მოიგო. წლეულს ეს შეჯიბრება ახალი ფორმატით ჩატარდა. ჯგუფური ტურნირის მოგების შემდეგ, “ბორჯღალოსნებმა“ ჯერ ნახევარფინალში გაიმარჯვეს. ფინალში კი, ესპანურ ბადახოსში პორტუგალიის ეროვნულ გუნდს 38:11 მოუგეს.

თამაში ჩვენმა გუნდმა მძიმედ დაიწყო. რამდენიმე შეცდომას პორტუგალიელების სახიფათო იერიში მოჰყვა და მეტოქემ ანგარიში ლელოთი მე-6 წუთზე გახსნა – 5:0.

ჩვენმა მორაგბეებმა მალევე შეძლეს მობილიზება და საკუთარი თამაშის ძიებაში მე-14 წუთზე პირველი ლელოს გატანა მოახერხეს. “ბორჯღალოსნები” ჯარიმის უპირატესობას თამაშობდნენ. მარცხენა ფრთაზე წარმოქმნილი რაკიდან ვასილ ლობჟანიძემ ბურთი მარჯვნივ გრძელ ფრთაზე გამოიტანა და დავით ნინიაშვილს გაატანა. მან სწრაფად წაიწია წინ, მეტოქის მცველი თავისკენ მიიზიდა და ფრთაზე აკაკი ტაბუცაძეს გაატანა. მას ლელომდე წინააღმდეგობა არ შექმნია. თედო აბჟანდაძემ გარდასახა – 7:5.

მომდევნო ლელო ჩვენმა გუნდმა 14 წუთის მერე მიითვალა. დერეფნიდან ხაზზე გატანილი ბრუთი აბჟანდაძემ ტაბუცაძეს ეფექტურად გაატანა. ჩვენი გუნდის ბომბარდირმა ხაზი გაჭრა და მეტოქე ისევ დაალელოვა. აბჟანდაძემ ამჯერად ვერ გარდასახა – 12:5.

ამის მერე თამაში ისევ აგვერია. მატჩის არბიტრმა განზრახ უხეშობისთვის მერაბ შარიქაძე გაასინბინა. პორტუგალიელებმა ამით ისარგებლეს და ორი საჯარიმოს გატანის წყალობით ანგარიშში სხვაობა მინიმუმამდე შეამცირეს – 11:12. ასე დასრულდა პირველი ტაიმი.

შესვენების შემდეგ ვითარება მოედანზე რადიკალურად შეიცვალა. საქართველოს ნაკრებმა დაცვაში უშეცდომოდ და, ფაქტობრივად, უჯარიმოდ ითამაშა. იმდენად, რომ მეტოქეს მონაგარისთვის აღარაფერი შეუმატებია. ჩვენო მორკინალების აგრესიული ბოჭვებმა და სტატიკაში გამართულმა თამაშმა შედეგი გამოიღო.

მეორე ტაიმი საქართველოს ნაკრებმა მძლავრი შეტევით დაიწყო და სამ წუთში ანგარიშში კიდევ უფრო დაწინაურება შევძელით. დერეფნიდან მოლის აგორების შემდეგ ლელოში ბურთით ხელში შერკინების კვაჭი შალვა მამუკაშვილი იყო. აბჟანდაძემ გარდასახვა ვერ გაიტანა.

მეტოქის საბოლოოდ გატეხვა “ბორჯღალოსნებმა” დასკვნით 20 წუთში შეძლეს, რომლსი დროსაც უკვე ყველა კომპონენტში ვდომინირებდით მეტოქეზე. 63-ე წუთზე თავი ისევ მორკინალებმა გამოიჩინეს. მოლით ისევ დერეფნიდან შევუტიეთ, რომელიც მეტოქემ წესის დარღვევით ჩააქცია. თუმცა, ბურთი უმალ შეცვლაზე შესულმა შერკინების ბურჯმა გურამ პაპიძემ აიტაცა და ლელო გაიტანა. აბჟანდაძემ ამჯერად ზუსტად გარდასახა – 24:11.

პორტუგალიელებს ფეხით ტაქტიკური დარტყმები თუ აქამდე გამოსდიოდათ, ამჯერად, პირწმინდად წააგეს.

69-ე წუთზე “ბორჯღალოსნებმა” მოედნის ცენტრიდან კონტრშეტევა წამოიწყეს. აკაკი ტაბუცაძემ მარჯვენა ფრთზე სისწრაფეში მეტოქე აშკარად დაჯაბნა და მერე ბურთი იქვე მიმყოლ შუამარბ დემე თაფლაძეს გაატანა, რომელმაც ბურთი ძელებს შორის დაამიწა. გარდასახვა შეცვლაზე შესულმა ლუკა მატკავამ გაიტანა – 31:11.

ბოლო, მეექვსე ლელო მატჩის დასრულებამდე სამი წუთით ადრე გავიტანეთ. ამჯერად, მოლით მარცხენა ფრთიდან შევუტიეთ. მეტოქე გაგვიძალიანდა. თუმცა, შეცვლაზე შესული შერკინების კვაჭი გიორგი ჭყოიძე მოლს დროულად მოწყდა და ბურთიანად ლელოში შევიდა. მატკავამ ესეც გარდასახა – 38:11.

“ბორჯღალოსნებმა” ამ ტურნირზე მე-100 მატჩი მოიგეს. ამავე შეჯიბრებაში კი, სარეკორდო 29-მატჩიანი წაუგებელი სერია დააფიქსირეს.

თამაშის საუკეთესო მორაგბე საქართველოს ნაკრების მესამეხაზელი ბექა გორგაძე გახდა.

lelo.ge

***

რაგბი ევროპის გამარჯვებულები

2000 წელი – რუმინეთი

2001 წელი – საქართველო

2002 წელი – რუმინეთი

2003-04 წლები – პორტუგალია

2005-06 წლები – რუმინეთი

2007-08 წლები – საქართველო

2009 წელი – საქართველო

2010 წელი – რუმინეთი

2011 წელი – საქართველო

2012 წელი – საქართველო

2013 წელი – საქართველო

2014 წელი – საქართველო

2015 წელი – საქართველო

2016 წელი – საქართველო

2017 წელი – რუმინეთი **

2018 წელი – საქართველო

2019 წელი – საქართველო

2020 წელი – საქართველო

2021 წელი – საქართველო

2022 წელი – საქართველო

2023 წელი – საქართველო