პრეზიდენტ ზვიად გამსახურდიას მიმართვა აშშ-ს სახელმწიფო მდივანს ჯეიმს ბეიკერს. 8.02.1992
1992 წლის 8 თებერვალს დევნილობაში მყოფმა საქართველოს რესპუბლიკის პრეზიდენტმა (ზვიად კონსტანტინეს ძე გამსახურდიამ მიმართა ამერიკის შეერთებული შტატების 81-ე სახელმწიფო მდივანს (1989-1992 წლები) ჯეიმს ადისონ ბეიკერ მესამეს, რომელშიც აღნიშნული იყო:
“როგორც ცნობილი გახდა თქვენ აპირებთ საქართველოში ჩამობრძანებას ქართველი ხალხის სისხლიან ჯალათთან ედუარდ შევარდნაძესთან ერთად. ედუარდ შევარდნაძე იყო იმ სამხედრო გადატრიალებისა და პუტჩის ორგანიზატორი, რომელმაც სისხლში ჩაახშო ქართველი ხალხის დემოკრატიული მონაპოვარი. ეს ავლენს თქვენს პირდაპირ ალიანსს დანაშაულებრივ ხუნტასთან, რომელიც ყოველდღიურად ღვრის უდანაშაულო ადამიანების სისხლს, ხვრეტს მშვიდობიან მიტინგებსა და დემონსტრაციებს, აპატიმრებს ასობით ადამიანს, უხეშად არღვევს ადამიანის უფლებებს, თრგუნავს პიროვნების თავისუფლებას. იმუქრება, რომ ადგილზე დახვრეტს ყველას ვინც კანონიერი ხელისუფლების დასაცავ მიტინგში გაბედავს მონაწილეობის მიღებას.
ყოველივე ეს წარმოადგენს ამერიკის შეერთებული შტატების პოლიტიკის დისკრედიტაციას, რომელიც თავის თავს დემოკრატიულ ქვეყნად მიიჩნევს. ხუნტასთან და მის ორგანიზატორებთან ურთიერთობით აშშ უგულვებელყოფს ხალხის მიერ კანონიერად არჩეულ საქართველოს ხელისუფლებასა და შედის საეჭვო ალიანსში დამნაშავეებთან და მაფიასთან.
ამგვარი მოქმედება ხელს შეუწყობს საქართველოში ტოტალიტარიზმისა და სახელმწიფო ტერორის განვითარებას, რასაც ყოველთვის გმობდა ამერიკის ოფიციალური პოლიტიკა.
მე პროტესტს ვაცხადებ ამ ალიანსის წინააღმდეგ და ვითხოვ, რომ შემხვდეთ მე, საქართველოს კანონიერ პრეზიდენტს და კანონიერი მთავრობისა და პარლამენტის სხვა წევრებს, რომელნიც დღეს იდევნებიან თვითმარქვია ხელისუფლების მიერ.
გთხოვთ შემატყობინოთ პასუხი.”
გამოცემა “ქართული აზრი” №6 26 თებერვალი 1992 წელი
მასალა მოამზადა დავით არაბიძემ
***
მიუხედავად საქართველოს კანონიერი პრეზიდენტის ზვიად გამსახურდიას პროტესტისა, ბატონი ბეიკერი მაინც ჩამობრძანდა საქართველოში შევარდნაძის მხარდასაჭერად,
ჯეიმს ბეიკერი და ედუარდ შევარდნაძე თბილისში, 1992 წლის მაისი
“ეს არის მესამე მოგზაურობა ჩემი საქართველოში. პირველად 1992 წელს ჩამოვედი, სახელმწიფო მდივნის რანგში. გვინდოდა გამოგვეხატა ჩვენი მხარდაჭერა საქართველოსადმი და განსაკუთრებით საქართველოს ახალი პრეზიდენტის, ედუარდ შევარდნაძისადმი” – განაცხადა ედუარდ შევარდნაძის დაკრძალვაზე ჩამოსულმა ჯეიმს ბეიკერმა 2014 წელს.
Iberiana - იბერია გუშინ, დღეს, ხვალ 